«Քանդակի լեզուն» կրթական ծրագիրը նախատեսված է կրտսեր և միջին դպրոցահասակ երեխաների համար: Այն բաղկացած է երկու հատվածից՝ տեղեկատվական և ստեղծագործական: Առաջին հատվածում մասնակիցներին տրվում է հակիրճ տեղեկություն Հայաստանի ազգային պատկերասրահի, թանգարանային վարվեցողության կանոնների մասին: Ծանոթանում են Հակոբ Գյուրջյանի կյանքին և գործունեությանը, քանդակ հասկացությանը, քանդակի տեսակներին, նյութերին, ժանրերին, որից հետո երեխաներին հնարավորություն է տրվում հատուկ ձեռնոցներով շոշափելու որոշ քանդակներ: Ստեղծագործական հատվածում մասնակիցներին տրամադրվում են նկարչական պարագաներ իրենց նախընտրած քանդակը նկարելու համար: Ծրագրի վերջում երեխաներն իրենց նկարներով կազմում են «Պատկերագիրք»:
«Ժանրեր, թեմաներ, հեղինակներ» ինտերակտիվ կրթական ծրագիրը նախատեսված է կրտսեր դպրոցահասակ երեխաների համար: Այն բաղկացած է երկու մասից՝ տեղեկատվական և ստեղծագործական: Առաջին հատվածում մասնակիցներին տրվում է ընդհանուր տեղեկություն կերպարվեստի տեսակների, գեղանկարչության ուղղությունների և տվյալ սրահում ներկայացված հեղինակների մասին: Երեխաները ծանոթանում են կերպարվեստի ժանրերին, որից հետո մասնագետի ուղեկցությամբ շրջում են սրահներում՝ ամրապնդելով ստացած գիտելիքները: Ծրագրի երկրորդ հատվածում մասնակիցներին տրամադրվում են նկարչական պարագաներ իրենց նախընտրած ժանրում ստեղծագործելու համար:
«Զարդանախշ. Հեքիաթ» ինտերակտիվ կրթական ծրագիրը բաղկացած է երեք մասից և նախատեսված է կրտսեր դպրոցահասակ երեխաների համար: Ծրագրի առաջին հատվածում մասնակիցները ծանոթանում են գրքային պատկերազարդումներին, հայկական զարդանախշերին, ինչպես նաև հայ վարպետների գրաֆիկական աշխատանքներին: Ծրագրի երկրորդ մասում մասնակիցներին ներկայացվում է նախապես ընտրված որևէ հեքիաթ, այնուհետև հաջորդում է ստեղծագործական հատվածը, որի ընթացքում մասնակիցները ներկում են տվյալ հեքիաթի նկարազարդումները:
«Խճանկար» ինտերակտիվ կրթական ծրագիրը նախատեսված է կրտսեր և միջին դպրոցահասակ երեխաների համար: Այն բաղկացած է երկու մասից՝ տեղեկատվական և ստեղծագործական: Ծրագրի առաջին հատվածում Հայ հին և միջնադարյան արվեստի ցուցասրահներում մասնակիցները ծանոթանում են մոնումենտալ արվեստի տեսակներին, ընդհանուր տեղեկություններ ստանում որմնանկարչության և խճանկարի արվեստի վերաբերյալ: Ներկայացվում է խճանկարի ստեղծման պատմությունը հին ժամանակներից մինչև մեր օրեր: Ստեղծագործական հատվածում ծանոթանում են նաև տեխնիկային՝ ինչպես ստանալ խճանկար և տրամադրվող նյութերի օգնությամբ (գունավո րդեկորատիվ քարեր, պլաստիլին) պատրաստում են Գառնու տաճարին կից գտնվող բաղնիքի հատակի խճանկարի տարբերպատկերներ:
«Իմ Կոմիտասը» կրթական ծրագիրը բաղկացած է երեք հատվածից և նախատեսված է միջին դպրոցահասակ երեխաների համար: Առաջին՝ տեղեկատվական մասում, մասնակիցները ծանոթանում են Կոմիտաս Վարդապետի՝ երաժշտի, փիլիսոփայի, մանկավարժի, բանաստեղծի և մեծ հայրենասերի հավաքական կերպարին, ներկայացվում են Կոմիտասին բնորոշ կամ իր առօրյայի մաս կազմող խորհրդանշական առարկաներ: Այնուհետև, խաղային հատվածում երեխաները մասնակցում են «Գուշակիր երաժշտական գործիքը» ինտերակտիվ խաղին: Ծրագրի ստեղծագործական հատվածում մասնակիցներին տրամադրվում են անհրաժեշտ պարագաներ կոմիտասյան երաժշտության ներքո «իրենց Կոմիտասին» պատկերելու համար:
«Գրքարվեստ» ինտերակտիվ կրթական ծրագիրը նախատեսված է միջին դպրոցահասակ երեխաների համար: Այն բաղկացած է տեսական, խաղային և գործնական մասերից: Առաջին մասում՝ տեղեկատվական հատվածում, մասնակիցները ծանոթանում են գրքի պատմությանը, տեսակներին, կառուցվածքին, որից հետո անդրադարձ է արվում հայ վարպետների գրքային պատկերազարդումներին: Ստացած տեղեկությունն ամփոփելու համար երեխաները բաժանվում են խմբերի և մասնակցում վիկտորինայի: Այնուհետև, գործնական-ստեղծագործական հատվածում երեխաները կատարում են խմբային աշխատանք՝ կիրառելով ձեռքբերված գիտելիքները: Խմբերին տրամադրվում են անհրաժեշտ պարագաներ իրենց ձեռքով պատկերազարդ գիրք պատրաստելու համար:
«Ծովը Հովհաննես Այվազովսկու կտավներում» ինտերակտիվ կրթական ծրագիրը նախատեսված է կրտսեր և միջին դպրոցահասակ երեխաների համար: Այն բաղկացած է երկու մասից՝ տեղեկատվական և ստեղծագործական: Մասնակիցները ծրագրի առաջին հատվածում ծանոթանում են Հովհաննես Այվազովսկու կյանքին, ստեղծագործությանը, ինչպես նաև հանճարեղ ծովանկարչի գեղանկարչական տեխնիկաներին: Ծրագրի երկրորդ հատվածում մասնակիցներին բաժանվում են նկարչական պարագաներ իրենց նախընտրած ծովային տեսարանը պատկերելու համար: